Am Stammtisch

Gosch i Beiz, wötsches gmüetli ha,
am Stammtisch hocked scho füf Maa.
Noch und noch sind’s immer meh,
jetzt chani scho acht Nase gseh.

Jetzt chunt no eine mit de Chappe,
de mues am andere Tisch en Stuel go schnappe,
er hocket ane, bestellt en Kafi,
wo isch denn üsen Stammtischschwafi.

Jetzt wird diskutiert, s Personal serviert.
De Fritz verzellt e Gschicht, wo fascht unmöglich isch.
Hüt sind Politiker dra, a dene chasch am meischte d Wuet usloh.

Denn chunt no eine de fangt a bocke,
will er nöd cha a sim Stammplatz hocke.
Jetzt sind’s scho 10 am eckige Tisch,
ich glaube, jetzt schmökts us de Chuchi vo Fisch.

De Seppi seit, ich ha es Hörgrät postet,
de Mauro froget, was het’s denn koschtet?

De Seppi lueget uf d Uhr und seit,
es isch jetzt halbi Zwei und dusse schneits … das Hörgrät hät total verseit.

Jetzt chunt no de Chnuri und hocket an Tisch,
us de Chuchi schmökts tatsächlich vo Fisch.
Bedienig, en Halbliter no uf de Tisch,
wie de Chnuri so glücklich hüt isch.
Was isch passiert, wönd ali wüsse,
ich ha hüt chöne mini Nochbere küsse.

Die erschte stöhnd uf, sie müend go choche,
der eint seit, blieb nochli hocke.
Allmählich leert sich denn de Tisch,
ich mag hüt würklich e kei Fisch.

Die Namen sind frei erfunden.
Bis zur nächsten Runde

BENI ENGELER,
GUNTERSHAUSEN